追隨趨勢

轉載自信報曹仁超<<投資者日記>>

2000年至今投資藍籌股再難產生百萬富翁（如果你只有三幾萬資本）；反之，衍生工具、二線股市場起碼有機會，因為隨時可升200％。致富之道在於追求高增長，例如2003年4月至10月，六個月內唔少衍生股權升值200％；2004年唔少資源股升值200％；2005年貴重金屬股升幅亦好大。玩二線股同衍生工具必須嚴守止蝕，但有機會由幾萬元身家變成一百萬元，方法係追隨趨勢。

　　不同時段有不同投資策略。今天我老曹投資策略係以穩陣為主，因為年紀大，輸唔起；反之，如果只有三幾萬元，加上年輕有為，投資策略自然應該博到盡，唔承擔高風險何來高回報？唔少人第一桶金皆來自炒賣二線股而非投資藍籌股（今天唔少藍籌股在七十年代、八十年代甚至九十年代仍然係二線股）！中國已富起來，未來唔少二線城市將變成大城市，你有冇眼光分析到哪些二線城市將變成大城市？有便不妨投資這些鄉鎮房地產。例如天津、武漢、重慶等，相信前景秀麗！股票亦一樣，哪些國企、紅籌股可快高長大？就要考眼光。香港公司應該長大者已長大，留下的二線公司長大機會唔大。今天以小資本發財唔係去創業而係投資優質二線股或內地優質二線城市，例如環渤海、中國中部同西部正向大家招手。七十年代本報指出英資企業光輝不再，華資企業將取而代之；八十年代最佳投資係回國開廠；九十年代在港炒樓可以發達；1997年後宜胸懷祖國放眼世界；2002年起睇好資源股同黃金。時代不斷在變，順勢者昌、逆勢者亡。錢往往向「多」的地方流，工作卻向「低」的地方去；哪裏工資低，工作便流向哪裏；邊個有錢，反而最易賺錢！如果你冇錢，便愈難賺錢。