投資哲學 (摘自<<信報>>曹仁超)

建立投資策略非常重要。技術分析準確度只有55％（如加入買賣費用，懂走勢同唔懂走勢嘅投資者成績冇分別）。真正有用嘅係趨勢唔係走勢。例如：

一、遠見（Vision）。簡單例子，1967年美國人收入係港人五十倍，未來應睇好美國還是香港？1978年香港人收入係中國人五十倍，到咗2007年港人收入仍係內地人五到十倍（視不同行業而定），你點睇中港經濟？

二、才能（Talents）。好多人以為係天賜，其實可以自行發展。甲、乙兩人，甲每天花一小時睇《信報》，乙每天花一小時睇其他報紙嘅八卦新聞，十年後誰跑出？甲還是乙？二十年後誰較富有？甲還是乙？三十年後誰生活無憂？甲還是乙？

三、創意（Creative）。甲性格係事事關心，世界上發生任何事佢都關心，包括近期台灣富商與女明星關係、小甜甜爭產案、徐步高殺人事件……。乙卻專注在本業、學習本業技巧及理財之道，將過去嘅失敗例子銘記於心，最後熟能生巧，在投資上發揮自己創意……。十年二十年後，甲乙兩人誰跑出？

四、持久力。一個牛市短則三年、一般五年、長則七年；面對自己睇好嘅股票上升便忙於止賺，卻不肯由頭揸到尾，忘記「止蝕唔止賺」嘅格言。過去有幾多人買入好股後，因太早沽出而錯過賺大錢機會？

五、抉擇。面對虧損，能否果斷地、堅決地執行止蝕？面對環境改變，有冇糾正自己從前的錯誤決定？以上五點決定你係邊一類人（一贏、二平、七輸錢）。