賺錢本能

最近一位命理大師和我老曹同時接受電台訪問，談及明年香港經濟展望。休息之時，佢話我老曹有「賺錢本能」（Profit
Instinct），唔知係咪真？我老曹木宰羊，只相信成功係三分天分、七分努力結果，只要平時多睇多想，便可訓練自己對市場敏感度，並擁有迅速作決定能­力。所謂賺錢本能，其實就係面對資訊之時作出迅速分析（snap
judgments），繼而作出快速決定（fast
decision-making），情況有如打網球，只要常打多練習，亦可訓練出回應對方發球本能，因此「賺錢本能」（如果有的話）並非先天，而係後天培訓­結果。呢次我老曹捕捉到黃金上升浪，其實係過去二十年努力觀察後成果；呢次捕捉到油價下跌浪，亦係五年努力學習分析石油市場結果。一如歌星，當踏上成功之路­光芒萬丈之前，可能係十年努力耕耘成果。冇付出何來收穫？我老曹唔否定先天因素，但後天努力往往更重要。睇法係你努力未必成功，但唔努力便一定唔成功。