長線投資

長線投資如烹鮑魚 -- 轉載自信報曹仁超<<投資者日記>>

　　當你決定投資或只係炒賣一隻股份前，首先決定要投入幾多資金，你對自己決定信心有幾大？無論承擔風險能力及財政狀況，所有分析員都唔可以為你作上述決定，因為分析員對象係廣大群眾，而非為你度身訂造，所以只能提供大市展望甚至個別股份推介，至於如何處理，完全係個人決定；千萬不可缸瓦佬打老虎（盡地一煲）！投資涉及兩點十分重要：一、when to buy（何時買入）；when to wait（何時耐心等候）。例如2002、03年吸納天然資源股、能源股、金屬股，當時形勢仍未明朗，市場極之反覆；反之，去年形勢明朗時，股價已進入偏高期，往往出現中期調整，追入後可能立即有短期損失。今年中央政府「十一．五」規劃打算壓抑天然資源、能源、金屬等需求，但市場至今似乎冇反應，到底應該買抑或應該等？通常入市時機係一隻股份完成整固期或出現突破時，呢方面需要耐心等候；二、不要恐慌，每次恐慌拋售或高價買入後，往往成為別人入市或獲利 時機；任何時刻都不能情緒化，嚴格遵守自己預先制訂策略，無論你係長線投資者、中線投機者或短線炒家，都應遵守自己策略。例如長線投資者便唔使關注短期波幅；如果你係中線投機者，股票買入後通常一年半載甚至更長，但須嚴守止蝕唔止賺，十單中五單賺、五單蝕，利潤已不俗（因賺錢係本金50％或以上，蝕本局限本金15％）。至於做炒家必須專業，如果連長、中、短策略都混亂，又點會賺到錢？煎雞蛋要手快，煎牛扒要技巧，整鮑魚要耐性……。