股神

轉載自信報曹仁超<<投資者日記>>

畢非德1930年出生，經歷大蕭條，今天擁有四百億美元身家。索羅斯同年出生，更受第二次世界大戰希特拉逼害，但今天擁有七十二億美元身家。伊坎（Carl Icahn）1936年出生，一度破產，今天有八十五億美元身家……。三大巨富有以下共同特性。

　　一、唔分散投資，集中所有力量少數自己識項目上。集中、專注、扣準乃成功之道：Jack of all trade, master of none！經常轉工人通常冇成就，只有肯花大半生一個行業上，成為此行業專門人才，才有出色表現。以畢非德巴郡為例，投資集中四隻股份：美國運通；可口可樂；富國銀行；吉列刀片（最近被寶潔收購），近年更減持富國，但仍係美國運通最大股東，佔12％；亦係可口可樂最大股東，佔8％。

　　二、評估風險，其中以索羅斯為最。1992年佢拋空一百億美元英鎊時計過，最大損失只係四億美元，正式四撥千斤。

　　三、獨立思考。當畢非德1973年2月開始吸納《華盛頓郵報》時，連華爾街分析員都睇到呢間值四億美元公司只售八千萬美元，但認為美股進入熊市不宜沾手。當伊坎購買Tappan每股七點五美元，當年每股資產淨值二十美元；佢又以每股七點八九美元購入Baird and Warner，每股資產淨值十四美元，亦係因股市回落，分析員唔建議買入。畢非德與伊坎認為，只要公司好，何須理會牛熊市？於是趁熊市大量吸納，最後獲得巨大財富。很多人太注重短線，結果賺大錢必係中長線而非短線炒家。